ئۆتۆمبێلی زیره‌كی خودكار له‌ شه‌قامه‌كانی له‌نده‌ن بڵاو ده‌بنه‌وه‌

له‌ ماوه‌ی پێنج ڕۆژی ڕابردوو ژماره‌یه‌كی زۆری ئۆتۆمبێلی بێ شوفێر كه‌ خۆیان به‌شێوه‌یه‌كی زیره‌كانه‌ ڕێگه‌ ده‌بڕن، له‌ شه‌قامه‌كانی له‌نده‌ن بڵاو بوونه‌ته‌وه‌ و كۆمپانیای "نیسان"ی ژاپۆنی بۆ تاقیكردنه‌وه‌ی ئۆتۆمبێله‌ زیره‌كه‌كان له‌نده‌نی پایته‌ختی به‌ریتانیای هه‌ڵبژاردووه‌.كۆمپانیای "نیسان"ی ژاپۆنی له‌ ڕاگه‌یه‌نراوێكدا ئاشكرای كرد، كه‌ بۆ ماوه‌ی هه‌فته‌یه‌ك ئه‌و ئۆتۆمبێله‌ زیره‌ك و خودكارانه‌ له‌ شه‌قامه‌ گشتییه‌كانی له‌نده‌ن بڵاو ده‌كاته‌وه‌ و به‌شێوه‌یه‌كی ئه‌زموونی به‌كاریان ده‌هێنێ و تاقییان ده‌كاته‌وه‌.ئه‌و ئۆتۆمبێله‌ كاره‌بایییانه‌ له‌ به‌شی ڕۆژهه‌ڵاتی له‌نده‌ن بڵاو كراونه‌ته‌وه‌ و به‌ وردی هێماكانی هاتوچۆ و وه‌ستان و حاڵه‌تی ڕێگه‌كان و كۆتا و یه‌كتربڕی ڕێگه‌كان هه‌ست پێ ده‌كات و به‌سه‌ر پرده‌كان و شوێنه‌كان ده‌كه‌ون، وه‌ك ئه‌وه‌ی كه‌سێكی ئاسایی ئۆتۆمبێله‌كه‌ لێ بخوڕێت.ئه‌و ئۆتۆمبێلانه‌ له‌ پێنج ڕۆژی ڕابردوو سه‌دان میل شه‌قامه‌كانیان بڕیوه‌، به‌بێ ئه‌وه‌ی هیچ كه‌سێك شوفێری ئۆتۆمبێله‌كه‌ بكات و تا ئێسته‌ش هیچ ڕووداوێكی هاتوچۆیان ئه‌نجام نه‌داوه‌، كۆمپانیای نیسانیش ئه‌مه‌ به‌ سه‌ركه‌وتنێكی گه‌وره‌ لێك ده‌داته‌وه‌ و ده‌ڵێ، ته‌كنیك و تایبه‌تمه‌ندی زیاتر بۆ ئۆتۆمبێله‌كان ده‌خه‌ینه‌ گه‌ڕ.جێی باسه‌ پێشتر كۆمپانیای نیسان به‌ فه‌رمی داوای مۆڵه‌تی له‌ پۆلیس و ده‌سته‌ی گواستنه‌وه‌ی شاری له‌نده‌ن كرد تا مۆڵه‌تیان پێ بده‌ن، ماوه‌ی هه‌فته‌یه‌ك ئۆتۆمبێله‌ زیره‌كه‌كانیان له‌ شه‌قامه‌كانی له‌نده‌ن تاقی بكه‌نه‌وه‌.

له‌وانه‌یه‌ ئاره‌زووی سه‌ردانی ئه‌م بابه‌تانه‌ش بكه‌ی!