ئیمارات له‌ سه‌ر مه‌ریخ شارێك دروست ده‌كات

حكوومه‌تی ئیماراتی یه‌كگرتووی عه‌ره‌بی، پڕۆژه‌یه‌كی نوێی راگه‌یاند كه‌ به‌گوێره‌ی پڕۆژه‌كه‌، له‌سه‌ر هه‌ساره‌ی مه‌ریخ شارێكی راسته‌قینه‌ بنیات ده‌نرێت. ئه‌م پڕۆژه‌یه‌ به‌شێكه‌ له‌ به‌شداریكردنی ئه‌و وڵاته‌ له‌ ركابه‌ریی زانستی بۆ گه‌یاندنی مرۆڤ بۆ سه‌ر مه‌ریخ.ئه‌و پڕۆژه‌یه‌ له‌ میانه‌ی كۆبوونه‌وه‌ی نوێنه‌رانی ١٣٨ وڵاتی دنیا ئاشكرا بوو و ناوی مه‌ریخی 2117ی لێ نراوه‌ و به‌م پڕۆژه‌یه‌ش ئیمارات ده‌چێته‌ پاڵ ئه‌و وڵاتانه‌ی ده‌یانه‌وێت له‌ مه‌ریخ وه‌به‌رهێنانی زانستی بكه‌ن.پڕۆژه‌كه‌ بریتی ده‌بێت له‌ پرۆگرامێكی گشتگیری زانستی و توێژینه‌وه‌ له‌ بواری دۆزینه‌وه‌ی هه‌ساره‌كه‌ و هاوكات ئیمارات له‌ دۆزینه‌وه‌ی هه‌ساره‌ی تریش هاوكار ده‌بێت و له‌ 100 ساڵی داهاتووشدا ئامانجه‌كه‌ی ئه‌وه‌یه‌ شارێك له‌سه‌ر مه‌ریخ بنیات بنێت.شێخ محه‌مه‌د بن راشد سه‌رۆكی دوبه‌ی له‌گه‌ڵ شێخ محه‌مه‌د بن زاید جێگری فه‌رمانده‌ی هێزه‌كانی ئیمارات و سه‌رۆكی ئه‌بوزه‌بی، پڕۆژه‌كه‌یان ئاشكرا كرد و تیایدا باسیان له‌ ورده‌كارییه‌كانی گه‌یاندنی مرۆڤ بۆ ئه‌و هه‌ساره‌یه‌ و دابینكردنی وزه‌ و خۆراك كرد. هاوكات باس له‌وه‌ كرا كه‌ رێگه‌یه‌كی نوێ بدۆزرێته‌وه‌ بۆ ئه‌وه‌ی له‌ ماوه‌یه‌كی كورتدا مرۆڤ بتوانێت هاتوچۆی ئه‌و هه‌ساره‌یه‌ بكات.پێویسته‌ بگوترێت هێشتا هیچ مرۆڤێك نه‌یتوانیوه‌ له‌سه‌ر مه‌ریخ بنیشێت و پێشتر چه‌ندان جار كه‌شتی ئاسمانی و ئامێری تایبه‌ت به‌ پشكنینی ئاسمانی بۆ ئه‌و هه‌ساره‌یه‌ نێردراوه‌ و توێژینه‌وه‌ و لێكۆڵینه‌وه‌كانیش به‌رده‌وامن.

له‌وانه‌یه‌ ئاره‌زووی سه‌ردانی ئه‌م بابه‌تانه‌ش بكه‌ی!